LEGAZPI CITY- Irido an apat na persona sa tolong magkakasuway na aksidente sa tinampo sa banwaan kan Castilla, Sorsogon.
Susog sa report kan kapulisan, pigbabaybay kan Fortuner na dara ni Inrique Quipia, 39 anyos an dalan pasiring sa Bulan, Sorsogon haleng Cawit, Cavite alagad sa pag-abot sa Purok 1 Brgy. La Union, Castilla, nagpreno ini tanagrig na paenoton an sarong pang behikulo sa kasabatan na direksyon.
Rason ini tangarig magbangga sa likudang parte kaini an motorsiklo na pigmamanehar man ni Jun Praga, 47 anyos. Parehong nagsapar nin minor na lugad an mga drayber asin danyos sa pagsadiring behikulo.
Sa saro pang aksidente, irido man an drayber asin backrider kan motorsiklo na nasa likod ni Edgardo Malaca, 49 anyos na pigmamanehar man an sarong traysikel.
Nagsenyal na suboot ini na mapawalang direksyon alagad nagbalong mag-overtake an motorsiklo na rason tangarig na ma- sideswipe ini ni Malaca.
Nabangga man an motorsiklong pigmamanehar ni Joven Marcellana, 29 anyos na haleng Sorsogon City pasiring sa ciudad kan Legazpi makalihis na mabangga sa sarong bisikleta na kinalulunadan ni Mariano Andes, 65 anyos.
Naokupar kaya kan nasabing bike an fast lane kan tinampo na rason tangarig na mabangga ini asin matumba sa semento.
Tulos man na idinalagan sa ospital an mga nairidong persona tangarig na matawanan nin magkakanigong asistensyang medikal.
