LEGAZPI CITY—Anom na parasisira gikan sa ciudad nin Tabaco Albay an nawawara puon pa kan Enero 2, 2025.
Segun ki Gel Molato, an pamayo kan City Disaster Risk Reduction and Management Office kan ciudad nin Tabaco, naaraman ninda an nasambit na insidente ngunyan na aldaw pa sana sa pag-report kan saro sa mga aki kan nawawara na kun saen dae suboot na nakokontak an mga ini.
Napag-araman na an mga parasisira mga taga-Tabaco mantang an mga pag-iriba taga-Pandan sa probinsya nin Catanduanes.
Susog sa detalye, naghali an duwang bangka mga alas-onse nin pagkaaga kan Enero 1, asin an huring contact kan mga ini alas-tres nin maaga kan Enero 2, 2025, na kun saen nagpaabot nin mensahe na pasiring suboot sinda sa pig-aapod na ‘Boya’ sa may parte kan kadagatang Pasipiko para magsira kairiba an mga taga-Catanduanes.
Dugang kan opisyal na hanggang sa presente dae pa makontak an mga naunambitang parasisira.
Naghagad naman nin tabang an saindang opisina sa mga Disaster Risk Reduction and Management Offices sa bilog na rehiyon kan Bicol para maalerto an mga ini lalo na an probinsya kan Catanduanes asin Camarines Norte na posibleng mapadpadan kan mga naunambitang parasisira.
Siring man nakipagkoordinar naman sinda sa Coast Guard Tabaco para maalerto man an saindang mga coast guard stations para mahanap na an mga parasisira.
Sinabi kan opisyal na an deskripsyon kan mga bangka kulay asul na may lining na puti mantang an saro may kulay yellow na may lining man na puti, warang pangaran, asin dae rehistrado an naunambitang mga bangka.
Mientrastanto, nangapudan man an opisyal sa publiko na en kaso may mahiling na bangka na base sa deskripsyon, o kaya indibidwal na napadpad sa saindang lugar, makipagkoordinar sainda para matawan nin tulos na aksyon kan saindang opisina.
