LEGAZPI CITY- Naglalaom an Animal Rescue and Adoption sa Tabaco City na magkaigwa nin dakulang impact sa publiko an isyu dapit sa pagtapok nin ikos kan sarong suspek sa dagat kan Sto. Domingo Albay.
Kun babalikan, nagviral an sarong video na pigpost kan menor de edad na suspek makalihis kaining ibarabad sa katubigan sakop sa banwaan nin Sto. Domingo kasuudma.
Tulos man na nadakop an suspek kaiba na an nagvideo asin dinara sa DSWD para sa magkakanigong disposiyon.
Segun kay Ednalyn Cristo an head volunter kan Tabaco Animal Rescue and Adoption sa intrevista kan Bombo radyo Legazpi tulos man sindang nagpasiring sa hepatura kan pulisya ngane na ireport an nasabing insidente.
Nagpasalamat man ini huli sa marikas an naging aksyon kan alkalde kan banwaan maging kang mga kapulisan.
Mientrastanto, dae man kaini mapugulan na manggigil sa mga suspek bilang sarong fur parent asin rescue volunteer.
Hagad kaini na maging mas lalong maghewas pa an education campaign dapit sa animal welfare asin pigpapahiling suboot kaini na seryuso an nasyon sa batas manungod sa pag-aataman nin hayop.
