LEGAZPI CITY – Nag-overheat na makina an pigtuturong kawsa kan nangyaring kasulo sa sarong ambulansya na madara kuta nin pasyente hale sa Tiwi pasiring sa ciudad nin Legazpi.
Sa intrevista kan Bombo Radyo Legazpi kay Fire Inspector Lodimer Andez kan BFP Malilipot, wara man nin nahiling na ibang problema an ahensya sa sakayan apwera na sana sa makina kaini na posibleng nag-init hasta sa magkawsa nin kasulo.
Napag-araman na nagbabiyahe na sa tinampo an ambulansya kan senyasan an drayber kan ibang mga motorista sa nahiling na kasulo sa ibabang parte kaini.
Tulos man na naibaba an pasyante asin an tolong iba pa na sakay kaini mantang binalo pa man ining palsokon gamit an fire extinguisher alagad dae na naagapan pa.
Wara man na nairehistrong nakulogan sa insidente mantang pinagkakarkulong nasa P150,000 an danyos sa insidente para sa totally damaged na behikulo asin sa mga gamit na nasa laog kaini.
