LEGAZPI CITY– Amay na binayaan kan sarong ama an saiyang tulong aki makalihis na magdesisyon na tapuson an sadiring buhay.
Nadukayan na nakabitay sa laog kan harong gamit an nylon na pisi an biktimang si Darwin Loquinario, 39-anyos, sarong tricycle driver asin residente kan Relocation Site, Barangay Anislag, sa banwaan kan Daraga.
Base sa impormasyon na naguno kan Bombo Radyo Legazpi, nagta-trabaho sa abroad an esposa ni Loquinario asin igwa nin tulong aki na presenteng nasa pag-ataman kan saiyang panugangan sa Pilar, Sorsogon.
Ma-gradwar pa sana suboot sa grade 6 an matuang aki kaini asin saradit pa an mga nagsunod.
Sa pagresponde kan pulisya, namalisyahan na hibaba man sana an binitayan kan biktima kun sain nakadukot pa sa daga an bitis alagad pigtutubudan na tiniklop kaini an saiyang tuhod ngani na mangyari an pagpapagadan.
Mientrastanto, susog sa pahayag kan pinsan ni Loquinario na nagsayumang magpasabi kan saiyang pangaran, igwa ini nin problema sa pamilya urog na sa saiyang esposa na nasa ibang nasyun.
Sa ngunyan, dae man pighahali kan mga otoridad an posibilidad nin foul play kun kaya nagsasagibo na sinda nin imbestigasyon mantang pauli na man suboot sa Pilipinas an balo kan nasambitan na biktima.
