LEGAZPI CITY — Kinumpirmar kan National Bureau of Investigation (NBI) Bicol na naresibe na an pormal na kopya kan kahagadan sa imbestigasyon kan pigsasabing korapsyon sa quarry operations sa Albay.
Sa ekslusibong intrevista kan Bombo Radyo Legazpi ki NBI Bicol Director Atty. Tomas Enrile, nagkondusir na nin inisyal na imbestigasyon an ahensya sa pamamayo ni Atty. Edwin Romano kun sain ipigsasagibo naman an mga intrevista sa mga quarry operators.
Obheto kan nasabing lakdang an maaraman kun ano an proseso kan pagpapalakad sa mga operasyon asin madeterminaran an posibleng corroboration kan mga enot nang pahayag kan brodkaster na si Noli Ferrer na nagbuyagyag kan mga alegasyon sa nasabing isyu.
Kaipuhan na ma-identificaran segun ki Enrile an pagkakasunud-sunod kan mga pangyayari puon sa pagsugo sa pagbabayad kan pigsasabing “goodwill money”, sain hale an kwarta, nuarin nangyari an mga transaksyon asin kun legal an binayadan.
Tinawang-duon pa kan opisyal na ebidensya asin kalinawan kan isyu an pighahanap sa nasabing imbestigasyon.
