LEGAZPI CITY- Nagkokondusir nin massive disconnection activity an Albay Electric Cooperative para sa mga dae nakakapag settle kan saindang mga nakonsumong kuryente.
Marurumduman na enot ng pinuunan an nasabing disconnection activity puon pa kan bulan nin Enero.
Segun ki ALECO spokesperson Anj Galero sa intrevista kan Bombo Radyo Legazpi na obheto kan lakdang na maputulan na nin kuryente an mga konsumidores na haloy ng pigtatawan nin tsansa alagad hasta sa ngunyan an dae man nagbabayad.
Ini an ngani na maitama an sistema kan pagbabayad kan saindang konsumo.
Napag-araman na puon kan Enero hasta Pebrero nakapagrehistro na nin nasa 1,833 na mga konsumidores an naputulan nin suplay nin kuryente.
Aminado man si Galero na kadaklan an igwang mga kadifisilan sa pinansyal kaya dae nakakapag bayad alagad tinawan duon kaini an responsibilidad kan mga konsumidores na bayadan kun ano an saindang nakonsumo.
Paliwanag kan opisyal na dakula an epekto sa systems loss huli ta nakapag konsumo nin kuryente alagad dae man nagbabayad.
