LEGAZPI CITY – Nag-imbitar an grupong Consumer’s Rights Watch (CROW) Bicol sa mga power consumers sa Albay na magdangog asin mag-atendir sa isasagibong Ulat sa Bayan kan interim board kan Albay Electric Cooperative (ALECO).
Mangyayari an nasabing okasyon sa Sabado, Agosto 3 sa ganap na ala-1:00 nin hapon.
Sa intrevista kan Bombo Radyo Legazpi ki Toy Reynoso kan CROW, importante suboot na maaraman kun ano an nangyari sa interim board sa laog kan anom na bulan na itinaong palugit.
Dapat man suboot na natututukan an rehabilitasyon sa sistema na pighihiling na magpapakarahay man sa kabilugang padalagan.
Segun pa ki Reynoso, tutukaron man sa meeting an mga ipigsumiter na resolusyon kan interim board sa National Electrification Administration (NEA).
Naglalaom si Reynoso na magigin paagi man ini tangarig na maihayag kan mga consumidores an mga nai-eksperyensyahang problema sa power trippage, naraot na mga appliances, sala na billing asin minsan warang billing alagad notice of disconnection an maabot asin iba pang problema sa BAPA.
