LEGAZPI CITY – Dae makatubod an pamilya ni Cadet 1st Class Philip Modestano Viscaya na nagpangaduwa an saindang aki sa Philippine Military Academy (PMA) SALAKNIB (“Sanggalang ay Lakas at Buhay Para sa Kalayaan ng Inang Bayan”) Class of 2017.
Dakula an kaugmahan an namamatean kan amang si Nestor Viscaya huli sa naabot na kan saiyang aki an pangaturugan kaini na makapagtapos sa akademiya alagad may salak na pagkapungaw huli sa kakabit kan kinuang propesyon an saiyang buhay.
Matua si Philip sa anom na magturugang na binuhay asin pigtustusan an pag-aadal sa pagtatanom nin mais kan saiyang mga magurang.
Segun man sa ama, naging impluwensya sa paglaog sa PMA kan saiyang aki an mga parientes kaini na nasa hanay man kan militar.
Dae suboot ninda pigpensar na malaog ini sa PMA huli sa sadit na hawak ni Philip asin nakapokus sana sa pag-adal.
Alagad nagpursige suboot ini kan makalaog sa kolehiyo asin naging parte kan Bicol University Reserve Officers’ Training Corps (ROTC).
Mientrastanto, inako man kan ina na si Maria Elena Viscaya na bako siya pabor sa interes kan saiyang aki na maglaog sa militar.
Alagad kan nahiling na pursigido, sinuportaran niya suboot ini huli sa kun dae, posibleng magrebelde an aki.
Nag-abiso man si Elena sa mga magurang na kaipuhan sana suboot na suportaran an saindang mga aki alagad dae man liwat mawara an paggiya sa mga ini.
Nagtutubod man an ina na para sa puturo kan aki asin bako sa magurang an ginibong pagpapaadal sa mga ini.
Sa Miyerkules, Marso 8, mapasiring na sa Baguio an pamilya para sa graduation ni Philip.
Makakaresibe an Salutatorian sa Top 10 graduating cadets kan PMA nin Vice Presidential Saber, Philippine Army Saber asin Cum Laude award siring man, magiging parte si Phlip kan Philippine Army.
