LEGAZPI CITY- Nanindogan an Provincial Task Force Quarry na legal an nagin operasyon kontra sa inaprehender na personahe kan Rolco Construction na makapirang beses nang naaktuhan sa illegal quarry activity sa parte kan Brgy. Lidong kan Sto. Domingo, Albay.
Katakod ini kan alegasyon ni Manuel Orquico Jr., kagsadiri kan nasabing kompanya sa Provincial Legal Office asin ipigsakat sa Junta Provincial kan Albay, na nagsasabing tinutukan nin badil an nasabing personahe.
Sa intrevista kan Bombo Radyo Legazpi ki Task Force Quarry head Dave Cua, bulan pa kan Mayo sa presenteng taon kan abisuhan kan grupo an nasabing kompanya sa pagbayolar sa Section 45 (b) kan Provincial Ordinance 003-2018 na susog sa pagbabawal sa quarry outside permitive areas.
Nagpadagos man giraray an kompanya hasta sa mag-abot an Hulyo 11 kun saen ipinagsugo an pag-aprehender sa mga ekipahe kan Rolco huli sa major offense kan nasabing ordinansa.
Mientras tanto, pinahimutikan man ni Cua an pigsasabing nanutok nin badil an personaheng binistong si James Ruiz alagad aminadong may darang armas sa mga siring kaining operasyon.
En kaso maprobaran an nakomiter na pagbayolar sa ley, kaipuhan na magbayad kan penalty kan nasabing kompanya.
