LEGAZPI CITY- Binisita kan mga opisyal kan Albay Schools Division Office an nagkapirang mga banwaan sa provincia ngani na magtao nin asistensya sa mga paratukdo asin non-teaching personnel na naapektaran kan nakalihis na kalamidad.
Napag-araman kaya na igwang mga personahe an nadistroso an mga harong huli sa matinding epekto kan nasabing kalamidad.
Segun ki Albay Schools Division Office spokesperson Froilan Tena sa intrevista kan Bombo Radyo Legazpi na kaibanan sa mga nabisita an Libon, Polangui, Oas asin Guinobatan.
An programang ‘Albayanihan’ an sarong paagi ngani na matabangan na makabangon an mga apektadong personahe kan Department of Education.
Paliwanag kan opisyal na naaydentipikaran kan mga dibisyon an mga paratukdo na totally affected asin napaabutan na nin mga food items mantang pighahalat an masunod na batch kan ayuda para sa non-food items.
Mientras tanto, basado sa datos kan ahensya igwang nasa 69 totally damaged classrooms sa Albay an nairehistro huli sa nasabing bagyo.
Afuera digdi igwa man na nasa 376 classrooms an igwang major damages asin 1, 157 na minor damages.
