LEGAZPI CITY – Naglaan an Albay School Board nin P342,000 hale sa Special Education Fund (SEF) para sa mga delegado kan provincia sa gigibuhong Regional Schools Press Conference (RSPC) sa Enero 27-31, 2025.
Segun kay Albay Schools Division Office Spokesperson Froilan Tena sa intrevista kan Bombo Radyo Legazpi na an naunambitang pondo an gagamiton nganing matustusan an mga uniporme, bag, asin iba pang kagamitan kan haros 285 na estudyanteng delegado hale manlain-laing eskwelahan sa provincia.
Pigtaram kaini na P171,000 an inilaan para sa sublimated shirts, P85,500 para sa canvas cloth sling bags, asin P85,500 para sa mga iba pang kagamitan.
Obheto suboot kan taunang kompetisyon na patibayon an kakayahan kan mga estudyante sa pamamahayag asin tawan sinda nin tamang kaaraman mapadapit sa etikal na paggamit nin media sa paagi kan makabuluhan asin maayos na kompetisyon.
Piglalaoman man kaining magpapahiling nin husay an Albayano participants sa naunambitang event na mataong dalan man nganing maitaas an kalidad kan campus journalism sa rehiyon.
Pigtawan doon man kan opisyal na presenteng pigpapadagos an pag training kan mga estudyante nganing makaprepar an mga ini sa aktibidad na gigibuhon sa Sorsogon.
Nagpasalamat man ini sa Gobierno Provincial kan Albay na natawan sinda nin magkakanigong pondo asin nagmamawot ini na dakol an maiuuli na mga medalya kan saindang mga delegado.
