LEGAZPI CITY-Kinumpirma kan Albay Police Provincial Office (PPO) na pinalitan an chief kan Manito Municipal Police Station (MPS) mantang pigsasagibo an imbestigasyon sa insidente nin panghahabon sa Brgy. Cawayan sa Manito Albay kan Agosto 2.
Segun kay Albay Police Provincial Office Public Information Officer Police Major Kharren Formales, sa intrevista kan Bombo Radyo Legazpi na nangyari an insidente bandang alas 12:00 nin banggi hasta alas 4:00 nin maagahon sa nabanggit na lugar.
Naresibe suboot an report hale sa mga residente na igwa nin presensya nin mga armadong indibidwal sa nasabing lugar, kun sain tulos na nagrespunde pulisya.
Nagsagibo man digdi nin police responde, area security, asin nagkaigwa nin crime scene procession.
Mientras tanto, isinagibo man an palitan kan liderato sa himpilan kan pulisya sa Manito, ngani magsagibo suboot nin patas na imbestigasyon, tugunan an mga reklamo kan mga residentes, asin imbestigaran kun igwang mga lapses digdi.
Sa presente, padagos an pigsasagibong imbestigasyon asin pag-review sa mga CCTV sa lugar ngani matukoy an mga armadong suspek sa lugar.
Pig-engayar man kan pulisya an publiko na makipag-koordinar sa sainda ngani marikas na matukoy an pagkakakilanlan kan mga nasa likod kan insidente.
