LEGAZPI CITY – Nagpatanid an Albay Provincial Health Office sa publiko mapadapit sa mga helang na pwedesir makuwa sa mga pagbabaha na dara kan mga pag-uuran.
Segun kay Albay PHO Food and Water Borne Disease Coordinator Dr. Anthony Ludovice sa intrevista kan Bombo Radyo Legazpi na mahigot na pigmomonitor an mga kaso kan water borne diseases arug kan diarhea, cholera, leptospirosis asin dengue.
Pira sa mga sintomas na pwedesir mamatean kan mga magpopositibo sa helang iyo an LBM, stomach pain, pagsusuka asin panluluya.
Wara man suboot ining pigpipili na edad nin huli ta nakukuwa ini sa mga pig-iinom na tubig o pigkuwaan kan maiinom na tubig.
Pigtaram pa kan opisyal na wara pa mang naibareta mapadapit sa mga kaso kan mga nasambitang helang alagad dae ninda pighahale an posibilidad na magkaigwa urog na ngunyan na pigbabaha an mga nagkapirang barangay sa provincia.
Abiso kaini na mag-ingat sa pagkuwa nin tubig inumon sa mga gripo asin bubon lalo na kun dae sigurado an kalinigan kaini.
Tulos na magpa check-up kun enkaso maka-eksperyensya kan mga sintomas asin dae na ipagdara sa mga albularyo nin huli ta dae man ninda mabubulong an mga siring kaining kaso.
Syertuhon suboot na hale sa safe asin malinig na water source lalo na kun ipapainom ini sa mga joven asin umboy mantang dapat na pakuluan an mga iinumon na tubig nganing maasigurar na natanggal an mga mikrobyo sa iinumon.
Pag-asigurar ni Ludovice na may mga bastanteng bulong sindang nakapreparar enkaso may mag positibo sa mga helang na kawsa kan pagbabaha.
