LEGAZPI CITY – Nagpaluwas nin pahayag si Albay Governor Noel Rosal mapadapit sa pagkaka-arestar kan sarong dating konsehal sa banwaan kan Tiwi na suboot imbwelto sa payola sa quarry operations.
Segun saiya sa intrevista kan Bombo Radyo Legazpi na nagpapasalamat siya sa National Bureau of Investigation huli sa paghihingoa ninda na madakop an mga imbwelto sa ilegal na quarry operation sa provincia.
Maserbi man suboot ining patanid sa mga mawot pang maglaog sa mga siring kaining ilegal na kalakaran.
Ipigsugo niya man sa saiyang provincial administrator na pakarayon an sistema asin magsagibo nin imbestigasyon mapadapit sa sistema kan mga quarry operations sa enterong provincia.
Pinahimutikan man kan Gobernador an suboot kabale siya sa ilegal na kalakaran huli ta normal na sana sa sarong opisyal an magkuwa nin picture kaiba an iba pang opisyal kan gobierno.
Pigtuyaw niya man an ibang mga media na nagpapalakop nin salang impormasyon asin ipahiling an saindang professionalism huli ta nahihiling kan publiko an saindang salang pigbabareta.
Pagpapasumite man no Gov. Rosal an gabos na mga proyektong na pig-implementar bago siya magtukaw sa pwesto nganing aramon kun arin sa mga ini an tapos na o kun naresibi na kan gobierno.
