LEGAZPI CITY- Makusog an kamawotan kan alkalde kan Legazpi City na si Mayor Noel Rosal siring na man kan Department of Education (DepEd) Albay na ma-motivate an mga atleta kan probinsya para sa paparaning Palarong Bicol 2017.
Katakod kaini, kinumpirmar kan City Sports Coordinator kan Legazpi na si Rey Dimaculangan na ipapadara sa Manila an nagkapirang mga atleta partikularmente an malaban para sa gymnastics.
Ini ngani na magtraining nin anom na aldaw sa sarong gym na kumpleto an ekipahe.
Sigon ki Dimaculangan, ini na an puon para sa pag-motivate sa mga delegado kan Albay na magpursige ngani na makasungkit nin medalya sa nasambitan na pakawat.
Apwera digdi, nagpupuon na man suboot na magbakal nin mga ekipahe para sa planong pagkonstruhir nin Gymnastics Academy sa Albay Central School kun sain ipapadara man sa Manila an mga magigin coach ngani na magsairarom sa training.
Sa ibong na lado, sinabi ni Dimaculangan na napagdesisyunan kan komite na ibalyo sa Brgy. Banquerohan an venue kan kawat na Archery para sa kaligtasan kan iba pang atleta huli ta kaipuhan kaini nin 90×60 na field.
Sienerto man kan opisyal na kumpirmado na an gabos na lugar para sa mga event na an syudad kan Legazpi an host.
