LEGAZPI CITY — Inasegurar kan 9th Infantry Division kan Philippine Army na “in place” na an puersa kan gobierno sa pagbabantay sa Masbate.
Ipighayag ni Col. Paul Regencia, tagapagtaram kan 9th ID sa intrevista kan Bombo Radyo Legazpi na tulong semana na sa island province an ipinadarang special task group na hale pa sa Southern Luzon Command (SOLCOM).
Parte suboot ini kan substantial force na katabang an Philippine National Police, Philippine Navy asin Philippine Airforce na katabang kan Joint Task Force Bicolandia.
Nagsisirbe man suboot na main force sa area an 2nd Infantry Batallion mientras na nakatalaan pang mag-augment nin personahes sa command and control.
Segun ki Regencia, kaipuhan man nin magmamando sa mga barko asin helicopter urog na sa geographical aspect kan provincia tangarig na marikas na makapagtao nin responde sa anumang sitwasyon.
Nakikisumaro man an commandancia sa kamawotan para sa patas, honesto asin matoninong na pirilian dawa pa sa mga lugar na naikaag sa areas of concern kan Commission on Elections (COMELEC) huli sa presensya kan mga rebeldeng grupo, private armed groups magin sa mga lugar na igwang intense political rivalry.
Enot nang sinabi kan COMELEC an igwang nagsumiter nin resolusyon para sa dugang na pwersa sa Masbate.
