LEGAZPI CITY-Nagpahayag ng matinding pagtutol ang isang grupo ng mga kababaihan sa pagtatatag ng Pax Silica Hub sa Pilipinas.
Ayon kay Jen Nagrampa, tagapagsalita ng Bicolana Gabriela, sa isang panayam sa Bombo Radyo Legazpi, isinusulong ang proyektong ito dahil itinuturing na mainam na lugar ang Pilipinas para rito—ngunit magdudulot lamang ito ng pang-aabuso sa mga Pilipino.
Binanggit niya na ang malawakang korapsyon sa bansa at ang kawalan ng pag-unlad sa antas ng pamumuhay ng mga mamamayan ay malalaking problema rin.
Idinagdag niya na ang taumbayan lamang ang magsasakripisyo; bukod pa sa mga katutubong mawawalan ng lupa mula sa kanilang ninuno, magkakaroon din ng pagsasamantala sa mga likas na yaman ng ating bansa.
Nanawagan din siya sa pamahalaan na pag-isipang mabuti ang hakbang na ito at sa halip ay unahin ang paglikha ng mga trabaho nang hindi kailangang sumugal ng ari-arian ng mga magsasaka upang makahikayat lamang ng mga dayuhang mamumuhunan.
Lalo na sa kasalukuyan, aniya, kung saan ang bawat Pilipino ay nagtitiis at naghihigpit ng sinturon upang makakain lamang nang tatlong beses sa isang araw.











