LEGAZPI CITY – Enot na nakakumpleto nin 100% compliance an Catanduanes sa programang Kasurog Bantay Baril kan Police Regional Office 5 (PRO5).
Segun sa intrevista kan Bombo Radyo Legazpi ki PLTCOL Emsol Icawat, PIO kan Catanduanes PPO, nagluwas kan Martes an resulta kan validation na nagpapatotoo na an probinsya an enot na nakakumpleto sa bilog na Bicol.
Katuyuhan kan programa ni PRO5 Regional Director PBGEN Glenn Selvio na maibaba an bilang kan mga igwang expired o dai na-renew na License to Own and Possess Firearms (LTOPF) asin firearm registration.
Sa Catanduanes, na-account an gabos na 255 rehistradong firearm holders, kun sain nakatabang an dating mga programa arog kan Oplan Katok asin Kontra Boga.
Pigtawan-duon ni Icawat na bihira an mga insidente na may koneksyon sa badil sa probinsya, asin mas mapapadali na ngunyan an pag-monitor sa mga may unlicensed firearms.
Padagos man an ginigibong nightly patrol, anti-criminality tips, asin pagbisita sa mga harayong barangay para mamantenir an katoninongan.
Apela man niya sa mga taga-Catanduanes na mag-ingat sa aro-aldaw na buhay asin magrani sa kapulisan kun igwang problema.
