LEGAZPI CITY – Dai pa nagbaba sa threshold level an kaso nin dengue sa probinsya nin Albay, maski nagbababa na an bilang kaini.
Segun ki Engr. Al Barizo, spokesperson kan Incident Management Team (IMT) for Dengue Alert, sa intrevista kan Bombo Radyo Legazpi, nasa 51 kaso an nairehistro ngunyan sa probinsya.
Pigpaliwanag ni Barizo na nagbago-bago an bilang: nagpuon sa 41, nagsakat sa 51, nagin 65, dangan nagbaba naman.
Alagad, hasta ngonian, dai pa ini nag-aabot sa lebel na makukunsiderar na ligtas segun sa threshold na piggagamit kan Department of Health (DOH) para sa dengue alert.
Padagos an pag-monitor kan IMT, asin sa mga masunod na aldaw, ma-anunsyo suboot si Governor Noel Rosal kan pinaka-final update sa dengue monitoring sa probinsya, posibleng paagi sa sarong press conference.
Piglinaw man niya na an kadaklan na tinatamaan kan dengue iyo an student age — 0-10 asin 10-20 anyos.
Sa kada 100 kaso, mga 40% sana an kumpirmado, mantang an iba may indikasyon lang pero dai pa kumpirmado.
Padagos man an apela ni Barizo sa publiko na dai magkampante asin padagos na gibohon an 4 o’clock habit, linigan an mga stagnant na tubig, asin halion an mga lugar na pwedesir pagbonayan kan lamok na may darang dengue virus.
