LEGAZPI CITY-Gadan an siyam na pasahero na nakalunad sa sarong Learjet 60 an nagadan makalihis ining bumagsak sa Palm Beach County, Florida, harani sa Mar-a-Lago state ni US President Donald Trump.
Susog sa Federal Aviation Administration (FAA), an Learjet 60 naaksidente sa sarong residensyal na lugar harani sa Cresthaven.
An eroplano hale sa Austin-Bergstrom International Airport sa Texas pasiring sa North Eleuthera Airport sa Bahamas kan mangyari an aksidente.
Nakua an footage kan dashcam kun sain mahihiling an pag-dive kan eroplano antes na buminagsak sa daga asin nagputok, na nagpukaw nin sarong dakulang kasulo.
Kinumpirma ni US Transportation Secretary Sean Duffy na warang nakaligtas sa mga lunad kan nabanggit na eroplano.
An Federal Aviation Administration (FAA), nagpadara man nin sarong grupo nganing magtabang sa imbestigasyon kan National Transportation Safety Board (NTSB) mapadapit sa insidente.
Sa presente, dae pa pigbubuyagyag an pagkakabisto kan mga biktima mantang padagos pa an imbestigasyon kan mga otoridad kun igwang mga residente na nairido o naapektaran.
