LEGAZPI CITY—Arestado an sarong wanted person sa pagbalgar sa anti-child abuse law sa ginibong Manhunt Charlie Operation sa Barangay San Ramon, Tabaco City.
Binisto an akusado na si alyas “Marben'”, 40-anyos, asin residente kan nasabing ciudad.
Naarestar ini basado sa bisa kan warrant of arrest na inisyu kan korte sa Tabaco City na may petsang Oktubre 26, 2026 kun sain nahahampang ini sa kasong Statutory Acts of Lasciviousness sa irarom kan Article 226 kan Revised Penal Code na inamyendahan kan Republic Act 11648 o an Act Providing for Stronger Protection Against Rape and Sexual Exploitation and Abuse, Increasing the Age for Determining the Commission of Statutory Rape, na may kinaaraman sa Sec 5(B) kan Republic Act 7610 o Special Protection of Children Against Abuse, Exploitation and Discrimination Act.
An nasabing warrant an may penalidad na Reclusion Temporal o pagkakakulong nin dae kukulangon nin 12 taon asin sarong aldaw, asin dae malagpas nin 20 taon; may pigrekomendang piyansa ini na P180,000.
Sa presente, nasa kustodiya na kan Tabaco City Police Station para sa magkakanigong disposisyon.
