Pig-eeksamin kan House Committee on Dangerous Drugs an potensyal na pagkaimbwelto kan apat na dugang na foreign drug-trafficking networks sa illegal drug trade sa Pilipinas.
Nagluwas an impormasyon na ini kasunod kan committee briefing dapit sa pagprobar na ipalusot an shabu na nagkakantidad nin P3.4 bilyones pasiring sa nasyon hale sa Laos sa paagi kan sarong pribadong jet.
Segun sa impormasyon na ipinaabot sa komite kan sarong halangkaw na opisyal kan pulis, nagpapahiling na an mga grupong pig-iimbestigaran kabali an mga Chinese asin Chinese-Filipino nework, West African trafficking groups, asin mga criminal organizations sa Mexico.
An mga pangaran na nasambit sa report iyo an Sinaloa Cartel, an United Bamboo Gang, an 14K Triad, asin an Dragon Wu International Drug Syndicate.
Segun man sa Philippine Drug Enforcement Agency, igwa man nin mga alyansa an Sam Gor transnational drug syndicate sa nagkapirang triad groups.
Pinagkakarkulong 40 hasta 70 porsyento kan rehiyonal na merkado nin methamphetamine an kontrolado kan Sam Gor.
Padagos an imbestigasyon tanganing mabisto an mga posibleng imbuelto asin tanganing madeterminaran kun kaipuhan an dugang pang mga lakdang tanganing malabanan an transnational drug trafficking.
An mga koneksyon na nasambit iyo an mga alegasyon asin impormasyon na presenteng pig-iimbestigaran asin bako pinal na hatol kan korte laban sa mga grupong nginaranan.
