LEGAZPI CITY-Pinayuhan kan Presidential Task Force on Media Security (PTFOMS) an media na tutukan an mga kasong pigsasangat laban sa sainda, na posibleng makaapektar sa malayang pamamahayag.
May kinaaraman ini sa kabilaang pagsasangat nin kaso laban sa mga media executives asin mamamahayag, orog na sa pagkakaarestar sa beteranong Journalist na si Philip Lustre Jr. sa Davao City.
Segun ki Presidential Task Force on Media Security Executive Director Usec. Jose Torres Jr., sa intrevista kan Bombo Radyo Legazpi na may batayan man o wara an piskalya, dapat na bantayan kan mga mamamahayag an saindang kaso huli ta magkakaigwa ini nin epekto sa kalayaan ninda mantang nagpapahayag nin mga kritisismo.
Pig-abisuhan man ni Torres an mga Journalist na magin responsable sa pamamahayag, kuahon an kada kampo sa pag-ulat asin komentaryo, asin obserbaran an Ethics of Journalism.
Dapat suboot na dae magin ulang ini sa pagtataguyod asin pagbabalangibog kan katotoohan.
Sinabi pa kaini na enkaso masangatan nin kaso, dapat na magpasiring tulos sa korte o prosecutor’s office ngani malinawan o ma-verify an kaso antes na maaresto.
