Pigtawan onra an mga outstanding na estudyante asin paratukdo hale sa manlaen-laen na eskwelahan asin unibersidad sa Albay Kadunong Awards 2026, na ginibo kan Oktubre 20, sa Albay Astrodome sa ciudad nin Legazpi.
An nasabing aktibidad pinangenotan kan Gobierno Probinsyal kan Albay, sa suporta kan Provincial Education Department, tanganing midbidon an ekselente, dedikasyon, asin serbisyo sa lado nin edukasyon.
Kabale sa mga tinawan nin onra iyo si Harold Dave O. Calacday kan Ligao Community College, na nakakua kan pinakahalangkaw na ranggo (Rank 1) sa “Sampulong Silyab kan Albay.”
Siya, kaiba an siyam pang mga awardees, nakaresibe nin cash incentive na tig-70,000 pesos.
Sa intrevista kan Bombo Radyo Legazpi ki Calacday, dakula an pasasalamat kaini sa Provincial Education Department asin sa gabos na imbuelto sa nasabing programa.
Idinoon man niya an importansya kan edukasyon sa pag-uswag kan nasyon, na pignotar na an sarong naliliwanagan na hobenes igwa nin kapasidad na magpili nin marhay na mga lider, magtabang sa iba, asin magkontribwir sa mga inisyatiba na may katuyuhan sa pag-uswag.
