LEGAZPI CITY—Nagresulta sa pagkaarestar kan duwang persona, pagkakasalbar kan sarong menor de edad magin an pagkasakyada nin sarong drug den an ginibong buy-bust operation sa Purok 3, Barangay Tinago sa banwaan kan Camalig, Albay.
Segun ki Philippine Drug Enforcement Agency Bicol Spokesperson Carlo Fernandez, sa intrevista kan Bombo Radyo Legazpi, binisto an mga suspek na sinda alyas “Boboy” na drug den maintainer asin alyas “Godo”, 30-anyos; parehong residente kan Barangay Quirangay kan nasabing banwaan.
Mantang naisalbar man an 17-anyos na menor de edad na si alyas “Pya” na residente man kan nasabing barangay.
Nakumpiskar sa operasyon an labi 44.22 gramos nin pigtutubudang shabu na may standard value na pocomas o menos P300,700.
Pinangenotan an operasyon kan PDEA Regional Office 5 Regional Special Enforcement Team 2, PDEA Regional Special Enforcement Team 1, PDEA Albay Provincial Office, PDEA Sorsogon Provincial Office, PDEA Regional Office 5 Airport Interdiction Unit, Camalig Municipal Police Station, asin Coast Guard Intelligence Unit–Albay.
Sa presente, nasa kustodiya kan mga otoridad an duwang naarestar na suspek mantang ipig-turn over man an menor de edad sa local social welfare services.
Mahahampang an duwang suspek sa pagbalgar sa Sections 5, 6, 7, 11, asin 12, Article II kan Republic Act No. 9165 o an Comprehensive Dangerous Drugs Act of 2002.
