LEGAZPI CITY—Takdag sa kamot kan mga otoridad an sarong street-level individual sa kinasar na buy-bust operation sa Barangay Alnay, Polangui, Albay.
Binisto an suspek na si alyas “Santi,” 38-anyos, asin sarong construction worker.
Nakumpiskar digdi an siyam na heat-sealed transparent plastic sachets na may pigtutubudang shabu na may gabat na 10.2 gramos asin standard drug price na P69,360.
Ginibo an operasyon kan Polangui Municipal Police Station, Albay Police Provincial Office Police Intelligence Unit, 1st Provincial Mobile Force Company, 505th Maneuver Company, Regional Mobile Force Battalion 5, asin Philippine Drug Enforcement Agency Albay.
Basado man record sa Investigation Solution Automatic Verification, dati nang naarestar an suspek sa pagblagar sa Republic Act No. 9165, or the Comprehensive Dangerous Drugs Act of 2002, kan Hunyo 23, 2024, asin presenteng nasa irarom kan probation.
Mientrastanto, dinara na an suspek asin nakumpiskar na ebidensya sa Polangui MPS para sa magkakanigong disposisyon.
