Nagpapadagos ngunyan na Lunes an impeachment trial ki Vice President Sara Duterte kun sain isinalang kan House prosecution panel ang panibagong testigo ngani na simbagon an mga kahaputan dapit sa suboot mga indibidwal na pinagtagamahan nin confidential funds.
Ipinaapod kan prosekusyon sa witness stand si Philippine Statistics Authority (PSA) Assistant National Statistician Marizza Grande.
Inihayag kan prosekusyon na isasabay an mga opisyal kan PSA sa mga testigo para sa alegasyon nin salang paggamit nin confidential funds huli ta sinda an nagsagibo nin pag-aadal na nagpapahiling na an mga pangaran na nakalaag sa acknowledgment receipts siring kan Mary
Grace Piattos an dae ipinangaki, dae nagpakasal, asin dae nagadan sa Pilipinas huli ta wara sindang opisyal na rekord sa PSA.
Ipinaliwanag pa ninda na sa paagi kaini an maipapahiling ninda na fake asin fictitious an mga nasabing indibidwal, na nagpapatunay na igwang nangyaring manipulasyon asin salang paggamit sa pondo kan banwaan.
Maikot an testimonya ni Grande sa Article I kan impeachment case na nag-aakusa sa Bise Presidente nin pagbayolar sa ley huli sa sistematikong salang paggamit asin bako matanos na liquidation kan confidential funds na nagkakantidad nin P500 milyon sa Office of the Vice President (OVP) asin P112.5 milyon sa Department of Education (DepEd).
