LEGAZPI CITY—Ipigdoon kan sarong ekonomista na kinakaipuhan an job creation asin an halangkaw na suporta sa agrikultura nganing maresolbaran an 16.8% high poverty incidence sa rehiyon kan Bicol.
An poverty incidence an nagtutukoy sa pagbilang kun pira an tios asin kun pira an bako tios; kun sain an gabos na tios an ibabanga o idi-divide sa sumatotal na populasyon o pamilya nganing makua an rate kaini.
Segun sa sarong ekonomista asin Certified Public Accountant na si Dr. Emmanuel Onsay, sa intrevista kan Bombo Radyo Legazpi, saro sa mga nahihiling nindang rason kan halangkaw na poverty incidence an hibabang labor participation kan mga Bicolano na boot-sabihon na diit an mga obrero sa rehiyon. Ikaduwa an mas halangkaw na unemployment kan rehiyon kumpara sa national average kaini.
Pagdoon pa ni Onsay na huli sa kadaklan kan mga Bicolano an naglalaom sa agrikultura o dakol na pamilya an nakadepende digdi, kun kaya kada magkaigwa nin disruption, kalamidad, o iba pang factor mapadapit sa agrikultura an tulos na apektado an pamilya kan mga Bicolano.
Dugang kaini na bako bastante an ayuda kaya kinakaipuhan an job creation, segun saiya na an mga ayuda kaya an bako man sustenable asin sarong immediate relief. Mantang maray an ayuda alagad kinakaipuhan an conditionalities na saro sa mga epektibo an Pantawid Pamilyang Pilipino Program (4Ps), alagad an ibang tabang an dae naggigibo nin positibong resulta sa sosyodad.
Kinakaipuhan man an suporta sa agrikultura arog kan pagtaong ayuda sa mga paraooma o an pagsuporta sa mga abono, pesticides, herbicides o mga bulong, maski an pagbarewas nin subsidiya para sa sektor.
Segun saiya na an klase nin yield na pigtatanom an dapat na specialized man o mag-improve scientifically asin may mga programa na itinatao sa mga paraooma.
Nagtutubod man si Onsay na dapat igwa nin mga ispesipikong aktibidad an Bicol na nakasentro man sa problema kan rehiyon nganing sakto man an solusyon sa pangangaipo kan namamanwaan.
Liwat man tinawan-doon kan ekonomista na an may obligasyon o may mas responsibilidad nganing mas mapauswag an Bicol an kolektibong esfuersos kan gabos na provincia o munisipyo sa rehiyon, asin an gobierno suboot an dapat na maghiro nganing magtabang sa namamanwaan.
