LEGAZPI CITY-Pighayag kan Syria na ini naglalaom na ibalik an negosasyon sa Israel para sa sarong kasunduan sa seguridad na may katuyuhan na halion an mga pwersa kan Israel sa teritoryo kaini.
An Syrian Foreign Minister Asaad al-Shaibani nag-agyat sa Israel na aprobetsaran an oportunidad na ini para sa diplomasya, alagad nag-insistir na an pagpundo kan mga pag’atake kan Tel Aviv, iyo an pinakaprayoridad kan Damascus.
An mga pwersa kan Israel presenteng nag-eestablisar nin presensya sa timog-kanlurang parte kan nacion kasunod kan pagbagsak kan rehimen Assad kan 2024.
An tensyon orog pang naglangkaw kan an militar kan Israel dai pa sana nahahaloy na binomba an Abu al-Duhur airbase huli sa mga alegasyon na gagamiton ini kan Turkey, bagay na pignenegaran kan gobyerno kan Syria.
Susog ki Shaibani, maski an pagmukna nin mga buffer zone sa irarom kan United Nations dati nang pinagkasunduan, an Israel maski baga naglilikay sa pag-otob kan kasunduan.
Sa ibong kan kawaran nin tiwala kaini sa Israel, naglalaom pa man giraray an Damasco na an pangigipit kan Estados Unidos magbubunga sa pagbalik kan duwang lado sa pormal na orolay.
