Nagpatanid an Philippine Postal Corporation (PHLPost) sa publiko katakod kan mga naglalakop na pekeng text message o “smishing” na nagagamit sa pangaran kan ahensya ngani na manloko asin manghabon nin mga personal asin pinansyal na impormasyon.
Segun sa PHLPost, komon na nagpapadara an mga scammer nin mensahe kasabay kan kahina-hinalang link.
Pigtataram sa nasabing text na may problema suboot sa relivery kan parcel huli sa kulang na address, o kinakaipuhan na magbayad tulos nin “redelivery fee” gamit an credit o debit card.
Nilinaw kan ahensya na bako hali sa sainda an nasabing mga mensahe huli ta dae nuarinman naghahagad an PHLPost nin mga sensitibong detalye siring kan Bank account numbers asin card information; passwords, asin One-Time Passwords (OTPs) sa paagi nin text message.
Pinayuhan man an publiko na dae mag-click nin mga kahina-hinalang link, dae magtao nin personal o banking information, dae magbayad sa mga bako berepikadong website asin hilingon nin marhat an pinaghalian asin pagigin tunay kan kada mensahe na saindang nareresibe antes gumibo nin anuman na aksyon.
Nangapudan man an ahensya na magtenir na mapagmatyag asin alerto sa mga nareresibeng text, email, asin mensahe sa social media.
