LEGAZPI CITY-Nagsangat si Senator Francis “Kiko” Pangilinan nin propwestong langkawan an income tax exemption threshold poon ₱250,000 sa ₱350,000 kada taon ngani madagdagan an take-home pay kan milyun-milyong manggagawang Pilipino.
Sa irarom kan Senate Bill No. 2344, obheto kaining amyendahan an National Internal Revenue Code ( NIRC) ngani maiangkop an income tax exemption sa presenteng kalagayang pang-ekonomiya asin mapakusog an purchasing power kan mga pamilya.
Segun kay Pangilinan, unti-unti nang pigkakaon kan inflation an ganansya kan mga manggagawa huli sa padagos na paglangkaw kan presyo kan mga pangenot na barakalon.
Halos nauubos na suboot an kita kan mga Pilipino huli sa buwis asin halangkaw na gastuson.
Kun maisasabatas ini, magigin exempted sa personal income tax an enot na ₱350,000 kan taunang taxable income.
Sakop kan propwesti an mga self-employed asin professionals na naggagamit nin 8% gross receipts tax regime.
Kabale man digdi an pagtataas kan income thresholds kan iba pang tax brackets: kun sain magigin ₱500,000 para sa 15%, ₱1 milyon para sa 20%, ₱2.5 milyon para sa 25%, asin ₱8 milyon para sa 30% tax rate.
Segun pa kay Pangilinan, nakahanay an saiyang propwesto sa pangapudan ni Presidente Ferdinand Marcos Jr. sa saiyang nakaaging State of the Nation Address na taasan an personal income tax exemption ngani mabawasan an pasanon kan mga manggagawa sa tahaw kan padagos na paglangkaw kan gastuson.
