LEGAZPI CITY-Nangapudan si Senador Robin Padilla sa administrasyon na iprayoridad an pagpakarhay kan power supply asin sistema nin pampublikong transportasyon kan nacion bago an pagsulong kan rocket launch pasiring sa space.
Sa saiyang Kontra-SONA sa Senado, sinabi ni Padilla na dapat tawan nin mas dakulang kapangyarihan an mga local government units (LGUs) sa pagpapauswag kan mga proyekto sa enerhiya, orog na sa mga hararayong probinsya na nakakaeksperyensya nin brownout.
“Bakit hindi po kami payagan na magkaroon ng autonomy, na bigyan kami ng kapangyarihan sa inyong lugar, katulad ng pag-decentralize o pagdi-devolve ng ilang aspeto ng energy development?”, sabi ni Padilla.
Hinagad man kan senador na maparikas an proseso kan pagtugdok nin mga planta nin kuryente ngani masimbagan an kakulangan nin supply nin kuryente sa manlaen-laen na parte kan nacion.
Katakod kaini, tinawan nin duon ni Padilla an pangangaipo na mapagayon an sistema nin transportasyon, partikularmente sa Bicol Region.
Saiyang sinabi na haros 12 oras pa man giraray an byahe hale sa Metro Manila pasiring sa Bicol.
Mientrastanto, nagpahayag man ini nin suporta sa propwestong Freedom of Information Bill asin an propwestong ipagbawal an paggamit kan social media kan mga menor de edad.
