LEGAZPI CITY-Pasado na bilang ley an padusang kagadanan para sa cyberscam sa Myanmar.
Kinumpirma ni Union Parliament Speaker Aung Lin Dwe na naipasar an “Anti-Online Scam Bill” makalihis aprubaran kan parliyamento an mga pagbabago sa draft bill sa miting kan duwang kapulungan sa Naypyidaw.
Segun kay Lower house MP Aye Chan, dai man binago gabos an draft bill makalihis an nagin pag-oolay kan duwang kapulungan asin parehong igwang importanteng parte sa propwesto.
Basado sa draft legislation kan Mayo, papatawan nin sampulong taon hasta habambuhay na pagkakakulong siring man padusang kagadanan an mga imbuelto sa kadahasan, torture, unlawful arrest asin detention o malupit na pagtrato sa mga indibidwal ngani pwersahon na magtrabaho sa mga online scam center.
Mantang habangbuhay man na pagkakakulong an para sa mga nagpapadalagan kan online scam centers o nagsasagibo nin crypto scam.
Enkaso magbayolar digdi, ipapataw man an death penalty.
An anti-scam law, kaenot-enoting ley na naipasa kan bagong gobierno kan Myanmar, na pinamamayuhan ni dating junta chief Min Aung Hlaing.
Isinagibo an lakdang sa tahaw kan talamak na internet fraud factories sa war-torn country, kun sain target an web users sa bilog na kinaban sa paagi kan romance asin cryptocurrency investment cons.
