Kinondena ni Senator Francis “Kiko” Pangilinan an pagpapalakop nin mga salang impormasyon dapit sa Juvenile Justice and Welfare Act, na dae nakakatabang ngani na gibuhong mas salbado an pamilyang Pilipino.
Si Pangilinan, na pangenot na author kan Republic Act No. 9344 o Juvenile Justice and Welfare Act, an nagtaram na bako totoo an mga pahayag sa ley na nagtataong dalan ngani na makalaya an mga menor de edad na imbwelto sa krimen.
Segun sa senador, an pagpapalakop nin salang impormasyon dapit sa ley an dae nakakatabang asin mas nagdadara nin pagkalibong sa publiko.
Ipiglilihis suboot kaini an atensyon hali sa tunay na problema siring kan pagkakaigwa nin badil kan nagkapirang indibidwal, maluyang pagpapaotob kan ley, asin kakulangan nin suporta sa mga eskwelahan asin komunidad.
Sinabi pa ni Pangilinan na an Juvenile Justice Law an bako obheto na palagpason an mga krimen kan mga jovenes, kundi siertuhon na igwang tamang proseso asin paninimbagan mantang pigpo protehiran an diretsos kan mga aki na imbwelto sa pagbayolar sa ley.
Dugang pa niya na nakakaraot man an salang impormasyon huli ta nagdadara nin takot sa mga magurang asin naglalaag nin tatak sa mga nagtitios na jovenes.
Nangapudan man an senador sa publiko na dae tulos mantubod o magheras nin mga bako beripikadong impormasyon, urog na sa social media.
