LEGAZPI CITY-Pinag-olayan liwat an propwestong limitaran an access sa social media para sa mga kaakian na edad 15 anyos pababa kasunod kan insidente nin pambabadil sa eskwelahan sa Tacloban City kan Lunes, Hunyo 22.
Segun ki Senador Joel Villanueva, na presenteng nangengenot sa Senate Committee on Higher Technical and Vocational Education, na dapat siyasaton an manlaen-laen na bagay na nakaka-impluwensya sa gawi asin well-being kan mga estudyante, kaiba na an saindang exposure sa mga peligrosong mga content online.
Sinabi pa niya na pigtatampok kan insidente an pangangaipo na pag-adalan an mga lakdang ngani na orog na maprotehiran an mga kaakian o menor de edad, kabali na an mga propuesto na limitaran an access sa social media sa edad 15 anyos pababa.
Sa ngonian, pendiente pa sa kongreso an nagkapirang bills na may katuyuhan na ma-regulate an paggamit kan social media kan mga menor de edad.
Nag-aadbokasiya man an senador para sa mas intensive programs sa mental health arog kan pagdagdag kan numero kan mga guidance counselors ngani suportaran an mga pangangaipo kan mga estudyante.
Nangapudan man an senador na pag-adalan an mga protocol sa kaligtasan asin threat-assessment sa mga eskwelahan sa bilog na nacion.
Siring kan pagpapauswag kan pagmidbid kan warning signs kan kadahasan, pagpakusog kan koordinasyon sa pag-ultanan kan mga eskwelahan, mga magurang, lokal na gobyerno asin mga ahensya sa pagpapaotob kan ley, asin pagpahiwas kan mga inisyatiba laban sa anti-bullying initiatives asin pag-update kan mga plano sa pagresponde sa emerhensya.
