LEGAZPI CITY-Nagpaluwas nin panibagong mga alegasyon an mga nagpabistong dating bodyguard ni dating Ako Bicol Party-list Representative Zaldy Co.
Ini makalihis na pangaranan ninda an iba pang opisyal kan gobierno asin personalidad sa media na suboot nakaresibe nin kwarta hale sa dating kongresista.
Sa sarong pulong balitaan kansudma, Hunyo 16, ipinabosto kan abogado kan grupo na si Atty. Levi Baligod, an apat na bagong testigo.
Saro sa sainda an nagsabing kabale siya sa paghatod nin mga maleta kina dating House Speaker Martin Romualdez asin Senator Erwin Tulfo.
Pigkonekta man kan nagpabistong mga ”bag-men” ni Co si Commission on Elections (COMELEC) Chairperson George Garcia, sa suboot pagtanggap nin kwarta, na tulos na pinahimutikan ni Garcia asin inapod na kautikan an mga paratang.
Hinatudan man suboot ninda nin apat na maleta si Senator Francis Escudero.
Nagpahiling man an mga testigo nin nagkapirang ladawan na pigsasabing kaiba si Senator Kiko Pangilinan asin Sharon Cuneta asin mga tawohan ni Co.
Alagad, wara sindang naitaong detalye kun ano an koneksyon kaini sa saindang mga alegasyon.
Pinalagan man ni Sharon an pahayag na ini asin sinabing pawang kasinungalingan an mga paratang laban sa sainda.
Siring man na idinawit sa saindang alegasyon sinda MMDA General Manager at dating PNP Chief Nicolas Torre, sarong TV journalist asin kolumnista.
Padagos pang pigkukuwaan nin detalye an kampo kan mga nabanggit na opisyal asin personalidad mapadapit sa isyu.
