LEGAZPI CITY-Ipigbuyagyag ni House impeachment prosecutor asin Bicol Saro Party-list Rep. Terry Ridon na dai mababa sa 50 badil an suboot nakarehistro sa pangaran ni Vice President Sara Duterte asin saiyang agom na si Manases “Mans” Carpio.
Ini suboot an posibleng nakapagpalangkaw sa saindang aktuwal na net worth kumparar sa nakalaag sa mga Statement of Assets, Liabilities and Net Worth (SALN) kan Bise Presidente.
Segun kay Ridon, hahagadon kan prosecution panel sa Philippine National Police (PNP) an mga rekord kan may sadiri kan mga badil asin posibleng ipaapod an mga firearms dealer asin valuation expert sa impeachment trial ngani matuloy an kantidad kan mga ini.
Tinawan doon ni Ridon na dapat naideklara sa SALN an mga badil huli ta kaiba ini sa mga rehistradong personal na ari-arian na kaipuhang saro-saroon na ilista kan mga opisyal kan gobierno.
Sinabi ni Ridon an mga nasabing armas kompwesto nin mga rifle, revolver, shotgun, asin pistol na nakalista sa pangaran kan mag-agom na Duterte-Carpio.
Dugang pa niya na posibleng mag-abot sa milyun-milyong piso an kabilugang kantidad kan mga ini.
Parte suboot an isyu kan mga badil sa mga ebidensyang ipi-presentar kan prosecution sa impeachment case laban sa Bise Presidente.
Nakatakdang poonan an paglilitis kay Vice President Sara Duterte sa Hulyo 6, 2026.
