LEGAZPI CITY-Kinumpirma ni Acting Senate President asin Senate President Pro Tempore Win Gatchalian na kaipuhan nin 16 na boto kan mga senador ngani mahatulan si Vice President Sara Duterte sa nakatakdang impeachment trial sa Senado.
Segun kay Gatchalian, malinaw sa Konstitusyon partikular sa Article XI, Section 3(6) kan 1987 Constitution, na kaipuhan an pag-uyon kan 2/3 kan kabilugang numero kan mga senador bago magpaluwas nin hatol na conviction sa sarong impeachment case.
Ipinaliwanag niya na huli ta fixed sa 24 an membership kan Senado, dai mababago an requirement na 16 votes maski pa magkaigwa an numero kan maatendir o an political alignment sa laog kan impeachment court.
Sa presenteng sitwasyon kan Senado, nasa 12 senador an kaiba sa grupo ni Gatchalian mantang 10 naman an nasa kampo ni Senator Alan Peter Cayetano.
Dai man kaiba sa duwang kampo sinda Senator Jinggoy Estrada asin Senator Ronald “Bato” dela Rosa.
Nakatalaga kan Senate impeachment court an pre-trial conference sa Hunyo 18, mantang pigsugo an duwang kampo na magsumiter nin pre-trial briefs bago an nakatakdang petsa bilang paghahanda sa paglilitis.
Nakatalaga man na poonan an trial proper sa maabot na Hulyo 6, 2026.
Nabanggit man ni Gatchalian na posibleng magkaigwa nin importanteng papel sa proseso an nagkapirang attorney-senator, kaiba na sinda Senator Francis “Kiko” Pangilinan asin Senator Francis “Chiz” Escudero, huli sa saindang legal na background.
Siring man, nilinaw niya na sa irarom kan nagi-iral na Senate rules, an Senate President pa rin an dapat mamuno sa impeachment proceedings maliban kun an Presidente kan Pilipinas an siyang piglilitis.
Piglalaoman man ni Gatchalian na siya an mangengenot sa padangog kan kaso laban sa Bise Presidente bilang siya an may kapasidad bilang Acting Senate President.
