LEGAZPI CITY-Nagpaluwas nin mandamiento de aresto an Malolos Regional Trial Court (RTC) laban sa contratista na si Pacifico “Curlee” Discaya, asin saiyang agm na si Cezarah “Sarah” Discaya, asin siyam na iba pa katakod kan kasong malversation through falsification of public documents na igwang koneksyon sa suboot kickback scheme sa mga flood control project.
An orden ipinaluwas sarong aldaw makalihis na magsangat nin kaso nin malversation asin graft an Office of the Ombudsman kontra sa mag-agom na Discaya asin sa saindang mga kaibahan na akusado na si Merg Jaron Laus, Brice Ericson Hernandez, Jaypee Mendoza, Ernesto Galang, Norberto Santos, Lorenzo Pagtalunan, Juanito Coronel Mendoza, Floralyn Simbulan asin si Ma. Roma Angeline Rimando.
Segun sa jusgado, waranng pigrekomendang piyansa laban sa 11 akusado.
Mientrastanto, sinabi ni Department of the Interior and Local Government (DILG) Secretary Jonvic Remulla na nakatalaan na ilipatsa Bulacan si Curlee Discaya sa Lunes, Hunyo 8.
May koneksyon an kaso sa rehabilitasyon kan river construction structure sa Bulusan, Calumpit, Bulacan sa irarom kan Department of Public Works and Highways (DPWH) Contract ID No. 22CC0058.
Susog ki Assistant Ombudsman Mico Clavano, an imbestigasyon kan Ombudsman nagdiskubre nin suboot mga seryosong pagbayolar sa patakaran kan gobyerno sa pag-audit asin accounting.
Huli digdi, iligal suboot na nabenepisyuhan an St. Timothy Construction Corporation nin poco mas o menos P53.9 million na nagkawsa nin dakulang danyos sa pondi kan gobierno.
Sagkod ngonyan, an kampo kan mga akusado wara pang ipinaluwas na opisyal na pahayag manungod sa desisyon kan korte.
