LEGAZPI CITY-Pigtuyaw kan grupo nin mga paraooma an pagpapaoton kan price cap na P50 per kilo sa imported na bagas.
Segun kay Bantay Bigas Spokesperson Cathy Estavillo, sa intrevista kan Bombo Radyo Legazpi na sa saindang pagiikot sa merkado, igwang nagkapira na nalaagan nin price cap alagad dai pinagpapabakal huli ta baka malugi sinda.
Sinabi ni Estavillo na ibig sabihon kaini, halangkaw an presyo sa pagde-deliver kan mga importer asin kun dai mabebenta, mare-revoke an direchos na makapagpabakal nin bagas.
Pare-parehas suboot an agrangay kan mga retailer alagad napipiritan na sana sinda.
Tinawan doon man ni Estavillo na warang serbi an Executive Order (EO) No. 118 kasabay kan Republic Act (RA) No. 11203 huli ta halangkaw man liwat an presyo kan bagas para sa mga ordnaryong konsyumer.
Dagdag pa niya na dai man napapababa an bagas mantang padagos an paglangkaw kan mga barakalon asin serbisyo, arog kan pamasahe, utility, tubig, asin kuryente.
An resulta kaini, padagos na pagtitipid kan mga ordinaryong Pilipino orog na sa pagkakan kun kaya bako na suboot makangalas kun pigpipilahan an Kadiwa Program.
Dugang pa niya na maski igwang price cap na dapat sana para sa price control, dapat na isaalang-alang an kapasidad kan konsyumer, hababa asin abot-kaya an presyo, siring man an availability kan bagas.
Kadaklan sa igwang price cap, sarong klase sana nin bagas, alagad an iba nasa P55 pesos pataas na an presyo.
Paliwanag kan opisyal na hasta dai pigdadara an P20 per kilo subsidies price sa kadiwa center sa mga merkado, dai man mapapababa an presyo kan bagas.
Laoman kan grupo na hilingon kan gobierno an kapasidad kan mga paraooma asin magluwas sa saindang mga opisina, magduman sa sakahan asin haputon mismo sinda kun ano an dapat na gibuhon kan gobierno ngani matabangan sinda, imbes na nakatutok sa pag-iimport.
