LEGAZPI CITY- Sinabi kan sarong kongresista na dae nagin epektibo an intimidasyon kan kampo ni Vice President Sara Duterte asin mga tagasuporta kaini ngani na mapugulan na ma-impeach sa Kamara de Representantes.
Segun ki ACT Teachers Partylist Rep. Antonio Tinio sa intrevista kan Bombo Radyo Legazpi na patunay digdi an overwhelming na boto kan mga kongresista na nagboto pabor sa pagpapatalsik sa bise presidente.
Marurumduman na nasa 257 na kongresista an nagbotong pabor sa impeachment, 25 an nagboto nin ‘No’ asin siyam an nag-abstain.
Nagpapatunay sana suboot ini na igwang makusog na basehan an reklamo kontra ki Vice President Sara katakod kan pigtataram na iregularidad sa confidetial funds, dae maipaliwanag na yaman, panunuhol asin death threat sa buhay ni Presidente Ferdinand Marcos Jr.
Sinabi ni Tinio na an resulta kan botohan sa Kongreso an patunay na bako epektibo an pananakot kan kampo kan bise presidente, siring na ana kan amay na pag-anunsyar kan kandidatura sa 2028 presidential elections.
Nahiling suboot ini sa dae pagbaliktad kan boto kan dakol na mga kongresista.
Nagtutubod man an lehislador na makusog an ebidensya kontra ki Vice President Sara kaya sa ibong kan sitwasyon sa Senado, kumpiyansa sinda na mausad an impeachment kontra sa opisyal.
