LEGAZPI CITY-Nag-alokar nin labi sa P100 Milyon an Department of Labor and Employment (DOLE) Bicol sa paagi kan “Tulong Panghanapbuhay sa Ating Disadvantaged Workers” o TUPAD ngani suportaran an apektado kan ashfall sa probinsya kan Albay.
Segun kay DOLE Bicol Regional Director Imelda Gatinao, sa intrevista kan Bombo Radyo Legazpi na sa paagi kan emergency employment na ini matatawan nin temporaryong trabaho an mga apektadong residente.
Sa irarom kaini kompwesto an trabaho nin clearing operation, community clean-up, revitalization kan saindang mga omahan sa luwas kan danger zones, asin iba pang social project sa mga komunidad.
Dagdag pa kan opisyal na obheto man kaini na makatabang an ahensya sa tulos na pag-ebakwar asin rehabilitasyon sa bilog na komunidad.
Kun kaya padagos pa an saindang profiling sa mga lugar orog na sa ikatulong distrito ngani matabangan an mga apektado kan pag-alburuto kan Bulkang Mayon poon kan Sabado.
Target man kan nabanggit na programa an labi sa 20,000 beneficiaries bilang temporaryong asistensya, kun sain makakaresibe nin P4, 555 na sahod para sa pagtatrabaho.
Padagos man an pagpapaotob kan ahensya nin manlain-lain an interbensyon sa mga naapektaran na agricultural workers asin farm workers siring man an saindang mga pamilya.
