LEGAZPI CITY- Naglalaom an grupong PISTON na dadangugon kan Land Transportation Franchising and Regulatory Board (LTFRB) an saindang pangapudan na dagdag na P10 sa minimun na pamasahe.
Enkasong aprubaran, magigin P23 na an minimum na pamasahe sa mga public utility jeepney.
Segun ki PISTON President Mody Floranda sa intrevista kan Bombo Radyo Legazpi na dae ninda pigahagad an nasabing dagdag pasahe ngani na yumaman sinda, kundi ngani na maibalik an nawawarang ganansya sa mga drivers na apektado kan padagos na paglangkaw kan presyo kan produktong petrolyo.
Ipigduon kaini na warang nagigibo an gobierno ngani na mapababa an presyo kan langis.
Nangapudan an opisyal na mahiling an pangangaipo kan mga nasa sektor kan transportasyon urog na ngunyan na panahon kan krisis.
