LEGAZPI CITY – Generally peaceful an nagin assessment kan mga kapulisan sa pag-obserbar kan kabilugang Semana Santa sa provincia kan Sorsogon.
Segun ki Sorsogon Police Provincial Office Public Information Officer Police Major Arwin Destacamento sa intrevista kan Bombo Radyo Legazpi na may mga nairehistro man sindang insidente nin pagkalamos asin gabos na mga ini an matrayumpong narespondehan kan saindang mga personahes.
Dakulang bagay suboot an presensya kan mga law enforcement agencies sa mga karigusan sa provincia nganing maibitaran an casualties.
Afuera man sa mga nairehistrong drowning incidents, nakapagrehistro man sinda nin vehicular accident alagad maikokonsidera sana ninda ini bilang minimal kumpara kan kaparehong peryodo kan nakaaging taon.
Pigtaram pa kan opisyal na dae man nagbago an nagpasiring sa mga pantalan huli ta kadakol an mga nalaog asin nagluwas sa Visayas asin Mindanao mantang pig-aprobitsaran kan mga turista an mga destinasyon sa saindang lugar siring man an mga nag-Visita Iglesia.
Pigheras niya man na maabot sa 700 na mga kapulisan na saindang pigdeploy sa mga strategic areas katabang an mga law enforcement agencies sa pagtatao nin seguridad asin asistensya sa publiko.
Pagdoon ni Destacamento na nakahanda na man sinda dapit sa piglalaomang pagbabalik kan namamanwaan sa kaniya-kaniyang lugar nganing magtrabaho asin nakatalaan na magtapos an saindang deployment sa maabot na Hunyo sa pagtatapos man kan saindang Oplan Ligtas SumVac ngonian na taon.
