Nagadan an sarong 18-anyos na babae makalihis na badilon sa payo sa sarong insidente nin pambabadil na nangyari mga alas 11:25 nin banggi kan Abril 2, 2026, sa Purok All-Ittihad, Bagua 2, Cotabato City.
Binisto an biktima na si Baby Jean Aping Guiapar, may agom, warang trabaho, asin residente kan Purok Katuli, Sultan Kudarat, Maguindanao del Norte. Tulos siyang nagadan makalihis na tamaan nin bala sa payo.
Susog sa report, nakaresibe nin apod an Police Station 4 hale sa sarong concerned citizen manungod sa pangyayari kan mga alas 11:40 nin banggi.
Tulos na nagresponde an alert team sa pangengenot ni PMSg Datu Halil Diocolano asin an duty investigator asin nag-abot sa pinangyarihan poco mas o menos alas 11:45 p.m.
Pag-abot sa crime scene, nadukayan na wara nang buhay an biktima asin nakahandusay sa sadiring dugo.
Nagluluwas sa inisyal na imbestigasyon na binadil an biktima mantang nakatindog sa pinangyarihan kan insidente gamit an pigtutubudang kalibre .45 na badil, basado sa narekober na empty shell sa pinangyarihan kan insidente.
Nakua man sa pinangyarihan kan insidente an nagkapira sa mga personal na gamit kan biktima, arog kan cellphone, charger, pregnancy test kit, asin bulawan na kulintas.
Makalihis an krimen, nagdulag an suspetsado na dae pa nabibisto.
Segun sa report, nakalunad siya sa asul na Honda Click na motorsiklo na may dae pa nabibistong plaka.
Pig-aaram kan mga pulis an posibleng motibo kan krimen, kabali na an suboot love triangle asin pagkakaimbwelto sa iligal na droga.
Sa ngunian, nagpapadagos pa an imbestigasyon nganing maaraman kun nyata yaon sa nasambitan ng lugar asin oras an biktima.
Nakolekta na man an CCTV footage hale sa lugar nganing makatabang sa pagbisto kan suspek.
Pig-alerto na man an mga haraning istasyon kan pulis asin mga checkpoints para sa posibleng pagdakop kan nakadulag na salarin.
An SOCO RFU BAR nagsagibo nin mahiwas na pagproseso sa pinangyarihan kan krimen.
Nairehistro an spot report kan insidente sa CTOC poco mas o menos alas 2:03 nin maagahon kan Abril 3, 2026. Padagos an imbestigasyon kan mga otoridad sa nasabing kaso.
