LEGAZPI CITY—Labi ang pasasalamat kan manhamiento kan Sorsogon City Fire Station makalihis marekognisar bilang Top 1 sa City Category para sa pagkundusir nin pinakadakol na aktibidades durante kan Fire Prevention Month.
Segun ki Sorsogon City Fire Station Fire Marshal Fire Inspector Maria Celeste B. Pancho, sa intrevista kan Bombo Radyo Legazpi, na an nagin tema ninda an maiheras sa komunidad sa saindang serbisyo o mga aktibidades sa mga eskwelahan, barangay, asin establishimiento kabale na an Oplan Ligtas na Pamayanan, feeding programs, fire drills, asin iba pa, na dapat maukodan kan lambang saro.
Nagin magayon suboot an nagin feedback sainda kan komunidad sa ginibo nindang mga aktibidades kontra kasulo.
Nagpapasalamat man si Pancho sa mga nagtabang asin naggsuporta siring kan Sorsogon City local government unit, mga personahes kan Sorsogon City Fire Station nganing makua an nasabing honra; magin sa regional director kan BFP na nabibisto an saindang mga esfuersos.
Dugang kan opisyal na nakapagrehistro sinda nin 2 insidente nin kasulo puon bulan nin Enero hasta Marso 2026 sa naunambitang ciudad.
Mientrastanto, katakod man kan pag-obserbar kan Semana Santa, naka-red alert an saindang opisina asin naka-deploy na an mga personahes sa mga manlain-laing lugar.
Nangangapudan man si Pancho sa publiko na tanggalon an mga saksakan kan appliances na dae piggagamit, bantayan an mga pigluluto, asin pag-inspeksyon sa faulty electriclal wirings nganing malikayan an insidente nin mga kasulo.
