LEGAZPI CITY—Karsel an bagsak kan sarong babae sa ginibong operasyon kontra droga sa Barangay Baga-uma, Aroroy, Masbate.
Binisto an suspek na si alyas “Perla”, nasa legal na edad, may agom, residente kan nasabing barangay asin pigkonsiderar street-level individual.
Nakumpiskar saiya an pigkarkulong 5.62 gramos nin pigtutubudang shabu na may kantidad na labi P38,216, kaiba an iba pang drug paraphernalia siring kan aluminum foil, lighter, asin jewelry box na pigtutubudang ginamit sa pagtago nin ilegal na droga.
Ginibo an operasyon sa pinagsarong operatiba kan ng Aroroy Municipal Police Station, Masbate 1st Provincial Mobile Force Company asin Philippine Drug Enforcement Agency Regional Office V.
Sa presente nasa kustodiya na kan kapulisan an suspek asin mahahampang sa kasong pagbalgar sa Republic Act 9165 o Comprehensive Dangerous Drugs Act of 2002.
