LEGAZPI CITY-Pigbubusol na ni Senate President Vicente Sotto III an tuluyang pagbasura sa Oil Deregulation Law ngani maibalik an poder kan gobierno na magbugtak asin magkontrol kan mga presyo kan mga produktong petrolyo sa nacion, orog na sa tahaw kan epekto kan tensyon sa Middle East.
Sa paagi kan saiyang Senate Bill No. 1984, katuyuhan kaini na tapuson an pagigin malaya kan mga kompanya nin langis na magbugtak kan saindang mga presyo.
Segun sa mambabatas, panahon na ngani makiaram an estado huli sa direktang epekto kan krisis sa abroad sa bulsa kan mga ordinaryong Pilipino.
Sa irarom kan Republic Act 8479, na bisto man bilang Downstream Oil Industry Deregulation Act of 1998, hinale kan gobierno n kontrol kaini ngani gibohon na competitive an merkado pag-abot sa suplay asin presyo kan petrolyo.
Sa ibong kaini, nagpagirumdom si Sotto na bago maipasar an nasabing ley, pigtalaan na kan Energy Regulatory Board an presyo kan petrolyo basado sa global oil costs asin exchange rates.
Apwera digdi, an Oil Price Stabilization Fund an masalo sa pabago-bagong presyo sa pankinaban na merkado ngani maibitaran an biglaang mga pump prices.
