LEGAZPI CITY-Nanindugan an nagpabisto asin 18 mga dating Marines o militar sa saindang isinumiter na sinumpaang salaysay sa Office of the Ombudsman.
Kabale digdi an suboot pag-deliver kan male-maletang mga kwarta hale kay dating Ako Bicol Party-list Rep. Zaldy Co pati na sa nagkapirang mga opisyales kan gobierno asin kinatawan kan kongreso kaiba si dating Marikina 2nd District Rep. Stella Quimbo.
Sa sarong pahayag ni Belnard Tube asin Benny Bulontate, an kaiba sa mga dating militar, nanindugan sinda sa testimonyang naghatod nin mga maleta na pano nin kwarta sa harong mismo kan nadadawit na dating kongresista.
Suportado suboot ninda ini kan mga ladawan kan asin pigsisierto na tag-sadiri ini kan dating kongresista.
Basado sa ‘joint-affidavit’, pigsasabing nasa higit-kumulang P50 Milyon – P70 Milyon an laog kan maleta na pigdeliver mantang an mga saradit na maleta nagkakantidad suboot nin P15 Milyon – P25 Milyon pesos.
Marurumduman na si dating Marikina 2nd District Rep. Stella Quimbo, an nagin miyembro kan isinagibong bicameral conference committee asin nagserbing vice chairperson kan House Appropriations Committee sa nangyaring deliberasyon kan 2025 national budget.
